Joh 15 | MED | STEP | “Na nde wain kupa ei mor. Na nga Wuta nde wain pana rᵾp etᵾm.

John 15

Jisas Ei Nde Wain Kupa Morum

1 “Na nde wain kupa ei mor. Na nga Wuta nde wain pana rᵾp etᵾm. 2 Wain puⱡa mat na kᵾn mong rui narᵾm mbᵾ, koⱡmung etpa mundᵾmba. Wote puⱡa mat mong ropa pem mbᵾ, poⱡ ndupa etpa, kai etangga, mong minal romba. 3 Enim ik nᵾmp ngur ni kᵾⱡ ndi, enim kor nga etpa eng nᵾndrᵾm. 4 Na kᵾn, rᵾmp nduk, moⱡung ndam, na enim kᵾn rᵾmp ndup muⱡimp ku. Wain puⱡa ti, na kᵾn rᵾmp ni nanim ndam, nambuⱡ etpa mong romba? Wain puⱡa ti, nde mam ei kᵾn, rᵾmp nimba pem ndam, mong romba. Ei mel ku, enim na kᵾn rᵾmp nduk, moⱡᵾng ndam, wain puⱡa kont mel mong ruing.

5 Na nde wain mam ei, enim nde wain puⱡa kᵾⱡ. Wamp nam ti, na kᵾn rᵾmp ndupa muⱡangga! Na wamp ei kᵾn, munt ndam, wamp ei mong minal romba. Na wak rokᵾn nim mendpᵾⱡ uⱡ ti, kapⱡa iti nᵾtin. 6 Wamp nam ti, na kᵾn rᵾmp ndup, muⱡi nambᵾⱡᵾm wamp ei, nde puⱡa mel rok tᵾk, ekit ndangina, tepa kuⱡangga! Wote aprᵾk tᵾk, ndip kᵾⱡing. 7 Enim na kᵾn rᵾmp nᵾk muⱡangina, wote na nga ik mong ei, enim kᵾn tem ndam, namba mel ti, numan nguk mawa eng ei, ting mint. 8 Enim na nga kitip kᵾni wamp ralk, mong minal rok peng ndam, Wuta nga uⱡ ronduⱡ eng nui mbᵾ, enim kᵾn etpa mot ndumba. 9 Wuta ndi, na numan ngurum ei mel, na ndi, enim numan ngur. Enim na nga wamp numan ngur uⱡ ila muⱡᵾi! 10 Na ndi, Wuta nga man ik ei, pilip tᵾp, elim nga wamp numan ngui uⱡ ila rukᵾr mor. Ei mel, enim ndi, na nga mi ik ei, pilik tᵾng ndam, na nga wamp numan ngui uⱡ ila muⱡing.

11 Enim ik kundᵾp nᵾnt ei ndi, Na nga numan kai pili uⱡ ei, enim kᵾn pemba. Wote, enim nga numan kai piling uⱡ ei, etpa kapⱡa endᵾmba. 12 Na nga mi ik ei ndi, nimba mel, “Na ndi, enim numan ngur ei mel, enim ndi, i ku etᵾk, ti ndi, ti numan ngᵾi! 13 Wamp nam ti ndi, elim nga kont muⱡ uⱡ ei, wamp ti nga nindpa, wak rom ndam, wamp numan ngui uⱡ wei etmin mbᵾ, tᵾpa mana ndumba. 14 Na ndi, enim kundᵾp nᵾnt. Ei mel eng ndam, enim na nga wamp mᵾn mendpᵾⱡ kᵾⱡ muⱡing. 15 Na ndi, enim kundᵾp, kindmant wamp ni nᵾnimp! Nambuⱡ emel, kindmant wamp ei ndi, elim nga wu nuim ei, etᵾm uⱡ mbᵾ pili napᵾtᵾm. Na ndi, enim mbi tep, na nga wamp mᵾn kᵾⱡ nᵾnt. Ei nambuⱡ emel, Wuta ndi, na man ik ngurum mbᵾ pora, enim kundᵾp nᵾt. 16 Enim ndi, na kᵾmp rok ti natᵾtᵾng. Na ndi, enim kᵾmp rop tᵾp, kongun ila tᵾp mundᵾr. Ei uⱡ nga kᵾnt nga nde mong minal, enim kᵾn ropa muⱡ piyangga! Wote enim ndi, na nga mbi tek angᵾndᵾk, atinga rok, namba mel ti, Wuta kᵾn mawa eng ndam, nᵾng mel mbᵾ pilpa ngumba. 17 Enim ndi, wamp mat numan ngᵾk muⱡᵾi! Ei na nga mi ik ei, enim kundᵾp nᵾnt.” nitim.

Mᵾi Kona Wamp Mbᵾ Ndi, Kitip Kᵾni Wu Mbᵾ, Numan Ngui Nganggᵾrᵾng

18 Mᵾi kona wamp mbᵾ ndi, enim numan ngui nganggᵾrmᵾn ndam, kuimp tek ngangᵾng, na numan ngui nganggᵾrᵾng ei mel ku, enim nᵾk pilᵾi! 19 Enim ya mᵾi kona ila wamp kat ndam, ya mᵾi kona wamp mbᵾ ndi, enim kᵾn mᵾn mondᵾk, numan nguⱡina. Wote na ndi, enim kᵾmp rop tit ei nga, enim mᵾi kona wamp ralk, muⱡing mel mon. I it uⱡ ei ndi, mᵾi kona wamp mbᵾ ndi, enim numan ngui nganggᵾrmin. 20 Na ndi, enim kundᵾp nit ik ni, pilik muⱡᵾi! ‘Kindmant wu ti ndi, elim nga wu nuim ei tᵾpa mana ndumba mel mon!’ Na mbun ngorung ndam, enim i ku iting. Na nga ik ei, pilik teng ndᵾⱡᵾngina ndam, enim nga ik ei, i ku etᵾk, pilik teng nduing. 21 Na ndi, enim kᵾmp rop tit ei nga uⱡ mbᵾ, enim kᵾn iting. Nambuⱡ emel, na tᵾpa mundrum wu ei, pili napᵾtmᵾn. 22 Na mana omp ik mbᵾ, ni nandilimba ndam, wamp mbᵾ nga uⱡ kit etmin mbᵾ, mot ni nandilinga. Wote akup, en enim nga uⱡ kit mbᵾ, mo ruing kona ti, ti natᵾtᵾm. 23 Wamp nam ti ndi, na numan ngui ngangᵾm ndam, Wuta numan ngui nganggᵾrᵾm ku. 24 Wamp ndi, iti natᵾtmᵾn uⱡ rᵾpndi mat, na ndi it. Uⱡ rᵾpndi mbᵾ iti natilimba ndam, wamp mbᵾ nga uⱡ kit etmin mbᵾ, mot ni nandilinga. Wote, uⱡ rᵾpndi mbᵾ, kandᵾk kelik, na kᵾn Wuta raⱡ, numan ngui nganggᵾrmᵾn. 25 En enim nga mi ik ila nimba mel, ‘Na kᵾn kai kandᵾk numan ngui nganggᵾrmᵾn,’ nᵾtᵾm. Mi ik ei omba, kupa etmba ei nga uⱡ mbᵾ iting mel enmin.

26 “Tᵾpa Rupᵾndi Muⱡnga kupa ei Wuta kᵾn morum. Morum ei, enim kᵾn tᵾpa mundangga, na nga ik mat tᵾpa pena ila pendpa nimba. 27 Wote enim ndi, na nga ik ninding ku. Nambuⱡ emel, unt kuimp tepa enim na kᵾn kunda murmᵾn,” nitim.